Mitumaw ang mga katingad-an nga ngalan nga giingong nalambigit sa pagdawat sa confidential funds sa Office of the Vice President o OVP atol sa ika-17 nga adlaw sa impeachment trial.
Atol sa direct examination sa prosecution counsel nga si Atty. Amando Ligutan, gipangutana niya ang testigo nga si Gina Acosta kung personal ba niyang nakita si Col. Raymund Dante Lachica, kanhi security chief ni dating Pangulong Rodrigo Duterte, nga naghatag og tig-P100,000 ngadto sa mga giingong benepisyaryo nga ginganlan og “Antonio Pagong” ug “Timon Andrew Pusa.”
Mitubag si Acosta nga wala niya personal nga nakita ang paghatag sa kuwarta.
Gipakita usab sa prosekusyon ang mga resibo nga adunay mga ngalan nga “Don Piang,” nga giingong nakadawat og P250,000; “May Pamana,” nga nakadawat og P150,000; ug “Shane Ngitngit,” nga giingong nakadawat usab og P150,000 gikan kang Col. Lachica.
Gipunting ni Ligutan ang pulong nga “ngitngit,” nga sa Cebuano nagpasabot og kangitngit, ug gilambigit kini sa usa ka resibo nga gipresentar na kaniadto sa proceedings nga adunay ngalan nga “Andy Lim.”
Nalakip usab sa mga dokumento ang ngalan nga “Xuniso P. Belat,” nga giingong nakadawat og P100,000.
Apan sa pagpangutana sa testigo bahin sa maong mga transaksyon, kanunay niyang gipahayag nga wala niya personal nga nakita si Col. Lachica nga naghatag sa kuwarta ngadto sa mga nakalista nga benepisyaryo.
Matod ni Acosta, nagsalig lamang siya sa mga dokumentong gisumite ni Lachica, tungod kay si Lachica ang maoy nagpatuman sa paggamit sa confidential funds.
