Gigamit sa House Prosecution panel ang duha ka adlaw sa pagdungog nga wala madayon tungod sa kalamidad aron susihon ug tun-an ang mga ebidensya, testimonya, ug uban pang impormasyon nga gihuptan batok kang Bise Presidente Sara Duterte.
Sumala sa panel adviser ug kanhi Rep. Ace Barbers, ang kalamidad wala makapugong sa panel sa pagrepaso sa kaso batok sa bise presidente ug pagtuon kung unsaon pagpalig-on pa ang mga argumento.
Bisan tuod ang panel nagtuon ug nag-analisar sa kaso kada adlaw, ang mga piskal gihatagan og duha ka dugang nga adlaw alang niini, lakip ang pagplano sa sunod nga mga saksi ug ebidensya nga ipresentar.
Sumala sa kanhing magbabalaod, bisan tuod wala magamit ang duha ka adlaw sa husay tungod sa kalamidad, ang panel produktibo gihapon sa pagpalig-on sa kaugalingon nga kaso.
Bisan pa sa daghang pagkansela sa mga adlaw sa husay, ang House panel naglaum gihapon nga ang pag-uswag sa husay batok sa bise presidente mapadali.
Tungod niini, gihisgutan sa House ang posibilidad sa pagdugang og laing adlaw sa kasamtangang tulo ka adlaw nga senemanang iskedyul. Sumala ni Barbers, ang Biyernes mahimong itudlo isip bag-ong adlaw sa husay.
Nagtuo ang kanhing magbabalaod nga bisan pa man og makadugang kini sa trabaho sa Senado ug sa Kamara, makatabang kini sa pagpadali sa pag-uswag sa kaso.
Samtang, gusto usab sa panel nga mapadayon ang momentum ug interes sa publiko samtang gihisgutan ang artikulo 1 o ang artikulo nga naglambigit sa confidential funds ni VP Sara.
Masaligon ang kanhing magbabalaod nga ang sunod nga pipila ka adlaw mahimong mas ‘makapainteres’ samtang gihisgutan ang confidential funds, tungod sa kadaghan sa ebidensya nga anaa karon sa panel.
Naglaum usab ang panel sa Kamara nga mopabor ang Impeachment Court sa sugyot nga ideklarar si Edward Fajarda isip usa ka hostile witness kung sa katapusan ipresentar na siya sa panel sa umaabot nga mga adlaw.
Sumala ni Barbers, sundan si Fajarda ni Gina Acosta, parehong special disbursing officers ubos sa duha ka opisina ni VP Sara.
