Gipangulohan ni President Ferdinand “Bongbong” Marcos Jr. ang pagsaulog sa National Heroes Day sa nasud niadtong Lunes, diin iyang giawhag ang mga Pilipino nga ipadayon ang espiritu sa patriyotismo ug kabayanihan.
Sa iyang mensahe, nanawagan ang Presidente sa mga Pilipino nga dili lamang maghinumdom ug magpasidungog sa mga nasudnong bayani, kondili ipadayon usab ang ilang mga gipakigbisogan ug gisakripisyo alang sa nasud.
Matod ni Marcos, ang mga katigulangan nakigbisog alang sa kagawasan, nanalipod sa dignidad sa mga Pilipino, ug mitukod sa mga pundasyon sa Republika nga gipabilhan sa nasud karon.
Gipasiugda sa Presidente nga ang pinakamaayong paagi sa pagpasidungog sa mga bayani mao ang pagpakita sa ilang kaisog, pagpadayon nga buhi ang gugma alang sa nasud, ug pagbarog isip responsableng mga lungsoranon.
Matod pa niya, nagpadayon ang espiritu sa kabayanihan pinaagi sa mga Pilipinong anaa sa frontline sa pag-alagad sa katawhan, ilabi na niining mga panahona sa panginahanglan.
Iyang gipasiugda nga ang kabayanihan dili lamang makita sa mga ngalan nga anaa sa mga libro sa kasaysayan, apan makita usab sa adlaw-adlaw nga pag-alagad, sakripisyo, ug pagpaningkamot alang sa kaayohan sa nasud.
