Nagkadako ang posibilidad nga maaresto si Senador Ronald “Bato” Dela Rosa, nga kataposan nga nakit-an sa publiko niadtong Mayo, sumala sa pamahayag ni Department of the Interior and Local Government (DILG) Secretary Jonvic Remulla.
Bisan pa man niini, wala na mopadayag og dugang detalye ang kalihim bahin sa maong hisgutanan basi sa iyang gihimong pamahayag.
Ang lakang sa pag-aresto kang Bato naggikan sa warrant of arrest nga giluwatan sa International Criminal Court (ICC) batok sa senador, usa ka lakang nga giila sa Department of Justice bisan pa sa opisyal nga pag-atras sa Pilipinas gikan sa ICC niadtong 2019.
Nagdumili usab si Remulla sa pagbutyag sa mga tawo nga posibleng nagpanalipod ug nagtago kay Dela Rosa, ingon man sa gidaghanon sa mga armas nga gitugyan sa kampo sa senador.
Sumala sa kalihim, ang paghatag og impormasyon bahin niini makasamok ug makaguba lamang sa gipahigayong mga operasyon sa kapolisan.
Gipatin-aw usab ni Remulla ang iyang unang gipagawas nga pahayag nga ang pag-aresto sa senador mahimong moresulta sa “body bags” o pagkaangol ug pagkamatay sa daghang tawo kon mopahigayon sila og “full operation”.
Sa pagkakaron, gipadayag niya nga padayon ang ilang negosasyon ug ilang matiktikan o magawas ra gihapon si Dela Rosa sa dili dugay nga panahon.
