Misaka na sa 24 ka mga estudyante ang nakalas human sa usa ka dakong sunog nga nilamoy sa duha ka eskwelahan sa Bukavu, sidlakang bahin sa Democratic Republic of the Congo.
Sumala sa mga lokal nga opisyal, kadaghanan sa mga biktima namatay tungod sa pagdinaganay o stampede samtang naningkamot ang mga estudyante nga makagawas sa nasunog nga tunghaan.
Gidala dayon sa pinakaduol nga ospital ang mga naangol nga tinun-an ug matud pa sa mga otoridad, posibleng mosaka pa ang gidaghanon sa mga biktima.
Gawas sa duha ka eskwelahan, kapin usab sa 300 ka mga panimalay ang hingpit nga naugdaw human paspas nga mikaylap ang kalayo sa maong dapit.
Sa kasamtangan, nagpadayon pa ang gihimong imbestigasyon sa mga awtoridad aron masuta ang husto nga hinungdan sa maong trahedya.
