Gipataas sa World Health Organization ang alert level sa Bundibugyo strain sa Ebola sa Democratic Republic of the Congo ngadto sa ‘very high’ tungod sa nagpadayon nga pagtaas sa mga kaso ug risgo sa dugang nga pagkaylap sa virus.
Matud ni WHO Director-General Tedros Adhanom Ghebreyesus, nagpabilin nga taas ang posibilidad nga mokaylap pa ang sakit sulod sa Congo, samtang taas usab ang risgo sa mga kasikbit nga nasud ug ubos pa sa pagkakaron ang hulga niini sa tibuok kalibutan.
Ang Bundibugyo strain maoy usa sa mga matang sa Ebola nga wala pay aprubadong bakuna o tukmang tambal, hinungdan nga mas nabalaka ang mga eksperto sa panglawas sa posibleng epekto niini.
Sa pinakabag-ong datos, miabot na sa 82 ang kumpirmadong kaso sa Congo, lakip ang pito ka namatay.
Dugang pa niini, kapin sa 170 ka gidudahang kamatayon ug halos 750 ka posible nga kaso ang padayon pang gisusi sa mga otoridad sa panglawas.
Samtang nagpadayon ang outbreak, gisusi karon sa WHO ang paggamit sa Obeldesivir isip posibleng tambal batok sa Ebola. Apan sumala sa organisasyon, kinahanglan kini gamiton ubos sa hugot nga medikal nga mga protocol ug dugang pang pagtuon.
Nagtuo ang mga eksperto nga posible nang mikaylap ang outbreak sulod sa duha ka bulan sa wala pa kini opisyal nga nadeklara, maong nagpadayon sa pagsaka ang ihap sa mga kaso samtang naningkamot ang mga awtoridad nga mapugngan ang mas lapad nga pagkatap sa sakit.
