Giinsistir ni Senador Rodante Marcoleta nga mahimo gihapon niyang matuman ang iyang mga katungdanan isip senator-judge sa impeachment court—lakip na ang pagbotar ug pagpasaka og mga manifestation—bisan pa man nga siya kasamtangang natanggong sa New Quezon City Jail.
Sa usa ka sulat nga gitumong ngadto kang Senate President Win Gatchalian ug Presiding Officer Chiz Escudero, nagsumite si Marcoleta og duha ka manifestation: ang usa nagsupak sa pagtudlo kang Escudero isip presiding officer, samtang ang usa nagsuporta sa pagpabilin sa rekisitos nga 16 ka boto alang sa conviction sa maong impeachment trial.
Gipahimug-atan ni Marcoleta nga walay makapugong sa iyang legal nga katungod sa pagbotar isip senator-judge, sanglit wala man siya gipailalom sa preventive suspension.
Si Marcoleta kasamtangang na-preso tungod sa kasong plunder nga may kalabotan sa usa ka donasyon nga iyang nadawat sa wala pa ang eleksyon niadtong 2022.
Samtang, nagpadayon ang debate sa impeachment court bahin sa gikinahanglang gidaghanon sa boto human gipataas ni Senador Erwin Tulfo ang posibilidad sa “acquittal by default” o pagpahuwas sa akusado kon mamenosan ang gidaghanon sa mga kwalipikadong senator-judges.
Tungod niini, giimbitar sa korte ang upat ka retiradong justices sa Korte Suprema aron magsilbing amici curiae o o “friends of the court” mga eksperto nga mohatag og opinyon bahin sa maong hisgutanan.
