Nakabsan sa kinabuhi ang usa ka 42 anyos nga lalaki human naigo sa naglumbaanay nga sakyanan pasado alas 3:30 sa kadlawon sa adlawng Biyernes , Septembre 11, 2026 .
Nahitabo ang disgrasya sa may Gov. M. Cuenco Avenue, Barangay Kasambagan sa dakbayan sa Sugbo.
Ang biktima giila nga si alyas “Rap-rap”nga, taga A. S Fortuna Barangay Banilad dakbayan sa Mandaue.
Nakabangga sa biktima ang usa ka Vios nga gimaneho sa ginganlan lang ug alyas “Billy” residente sa V. Rama dakbayan sa Sugbo.
Sa imbestigasyon sa Traffic Enforcement Unit nga gipagpangulohan ni Police Lieutenant Colonel Jomar Medil naigo ang biktima nga igo lang mitabok sa karsada.
Padung untang mosibat ang nakaigo sa biktima apan nakadasmag na usab kini ug usa ka green taxi.
.
Daling gidala sa tambalanan ang biktima apan nakabsan kini sa iyang kinabuhi samtang ang nakaigo nga si alyas Billy padayong gipangita sa mga otoridad .
