Nagdumili ang Department of Foreign Affairs (DFA) sa paghatag og mga detalye bahin sa kahimtang ni kanhi Ako Bicol party-list Rep. Zaldy Co, kinsa gikatahong anaa sa France samtang nag-atubang og mga kaso nga may kalabotan sa giingong mga iregularidad sa flood control projects.
Atol sa deliberasyon sa gisugyot nga badyet sa DFA, nangutana si Akbayan party-list Rep. Perci Cendaña bahin sa kahimtang ni Co sa France ug kung aduna bay gitakdang panahon sa iyang pagbalik sa Pilipinas aron atubangon ang mga kaso.
Matod ni Misamis Occidental Rep. Sancho Fernando Oaminal, ang sponsor sa badyet sa DFA, dili makapagawas og mga detalye ang ahensya tungod kay ang asylum applications hugot nga confidential ubos sa French law.
Hinuon, gipasiugda ni Cendaña ang mahinungdanong papel sa DFA sa pagtabang nga mapabalik sa Pilipinas ang mga indibidwal aron manubag sila sa mga kasong gipasaka batok kanila.
Si Co usa sa mga akusado uban ni kanhi House Speaker Martin Romualdez sa usa ka kasong plunder nga nagkantidad og P7.4 bilyones nga gipasaka sa Ombudsman kalabot sa giingong sistema sa kickback sa mga proyekto sa imprastraktura sa gobyerno, lakip na ang mga inisyatibo sa pagpugong sa baha.
Mibiya si Co sa nasod niadtong Hulyo 2025 ug wala pa makabalik sa Pilipinas.
