Nanawagan ang Department of Foreign Affairs (DFA) alang sa pagpugong sa mga pamahayag ug paggamit sa diplomasya, human sa mga komento sa Chinese Ambassador sa Pilipinas nga si Jing Quan, nga gitan-aw isip usa ka dili direkta nga hulga sa paggamit og pwersa.
Matod sa DFA, ang maong matang sa pinulongan dili makatabang sa pagpadayon sa pagsalig o pagpalambo sa maayong relasyon tali sa Pilipinas ug China.
Dugang pa niini, giawhag ang tanang langyaw nga mga diplomat nga mag-amping sa ilang mga pamahayag sa publiko.
Sa wala pa kini, nagkomento si Jing nga dali ra modaog ang China kung mogamit kini og pwersa, bisan pa man nga iyang gipasiugda nga dili kini buhaton sa Beijing, tungod kay tumong niini ang pagpreserbar sa kalinaw sa rehiyon.
Gihagit usab niya ang mga alegasyon nga ang China nagsilbi nga “tigmugna og problema” o (troublemaker) sa Southeast Asia.
Nahitabo ang pagbinayloay og mga pahayag tali sa mga opisyal sa Pilipinas ug China human gisupak ni Defense Secretary Gilberto “Gibo” Teodoro Jr. ang paghulagway ni Bise Presidente Sara Duterte sa Pilipinas isip usa ka “troublemaker” sa rehiyon.
Gipadayag ni Teodoro nga ang nasud nagdepensa lamang sa iyang mga katungod diha sa West Philippine Sea.
Samtang, nagpahayag si Jing og paglaum nga mahuman na ang negosasyon alang sa usa ka “Code of Conduct” sa West Philippine Sea—usa ka kasabutan nga gitumong sa paghimo og mga giya alang sa mga nasud nga adunay nagsapaw nga mga pag-angkon sa maong katubigan.
