Gipagawas na sa aktres nga si Kim Chiu ang iyang habig kabahin sa pagkasikop sa iyang igsoon nga si Lakambini “Lakam” Chiu.
Matod ni Kim, hilabihan gihapon ang iyang kasakit ug gibati sa maong sitwasyon.
Apan, gipili niya nga dili na maghatag og dugang komento tungod kay anaa na kini sa proseso sa balaod.
Gipasabot usab niya nga nasakitan siya pag-ayo sa mga negatibong komentong iyang nadawat sukad siya nakahukom sa pagpasaka og kaso batok sa iyang kaugalingong igsoon.
Giklaro niya nga ang maong isyu wala maglambigit sa iyang personal nga kuwarta, kondili sa iyang kompanya nga Little Bunny Philippines, Inc., nga iyang gitukod gamit ang iyang kinitaan sulod sa pipila ka tuig sa showbiz.
Ang kaso nga gipasaka sa iyang abogado naglangkob sa mga nahitabo gikan sa Enero hangtod sa Hulyo 2025, lakip na ang ubang sensitibong detalye nga dili mahimong ibutyag sa publiko.
Giluwatan sa aktres kini nga pamahayag human siya mitambong sa arraignment sa iyang igsoon—diin pormal nga gibasa ang mga kaso—didto sa Quezon City Hall of Justice.
Kahinumdoman nga si Lakam gidakop tungod sa 124 counts sa qualified theft nga naglambigit sa nawalang pondo gikan sa kompanya sa aktres.
