Gidakop si Lakambini “Lakam” Chiu, maguwang nga babaye sa aktres nga si Kim Chiu sa Mandaluyong City gahapong adlawa, Setyembre 20, tungod sa 124 ka ihap sa kasong qualified theft.
Matod sa mga awtoridad, si Chiu, 45-anyos, gidakop mga alas 4:06 sa hapon sa Barangay Wack Wack pinaagi sa warrant nga gi-isyu sa Quezon City Regional Trial Court Branch 84.
Ang maong kaso adunay girekomendar nga piyansa nga mokabat sa P5.838 milyon, kini subay sa reklamo nga gipasaka ni Kim Chiu kalabot sa giingong mga iregularidad sa panalapi nga nalambigit sa ilang negosyo.
Kahinumduman nga ang Office of the City Prosecutor nakakaplag og igong basehan aron pasakaan og kasong ‘qualified theft’ (124 ka ihap) si Lakambini.
Si Lakambini kasamtangang anaa sa kustodiya sa kapulisan ug temporaryong gitanggong sa ‘custodial facility’ sa Police Station 10 samtang nagpaabot sa commitment order gikan sa korte.
