Gipasalig ni Senate Committee on Energy Chairman Erwin Tulfo nga ang “systems loss charges” dili mahimong ipasa ngadto sa ubang bahin sa bayranan sa kuryente sa higayon nga hingpit nang tangtangon ang maong bayranan alang sa mga konsumidor.
Gipadayag kini ni Tulfo human sa mga kabalaka nga gipaabot sa pipila ka mga konsumidor nga basin bawion ra sa mga kompanya sa kuryente ang nawala nga kita gikan sa systems loss pinaagi sa pagpataas sa distribution, supply, o uban pang mga bayranan.
Matod ni Tulfo, ang Senate Bill No. 2486, o ang “Systems Loss Charge Removal Act,” klaro nga naglatid nga ang mga distribution utility ug electric cooperative dili mahimong mobawi sa “allowed losses” pinaagi sa ubang mga bayranan.
Apil niini ang distribution wheeling charges, supply charges, metering charges, universal charges, ug subsidies, ingon man ang uban pang bahin sa bayranan sa kuryente.
Gi-sponsor ni Tulfo ang maong balaodnon—usa sa mga prayoridad nga balaodnon sa administrasyon—sa plenaryo sa Senado niadtong Septiyembre 22.
Miinsistir ang senador nga dili angay pas-anon sa mga konsumidor ang gasto sa kuryente nga wala nila aktuwal nga nagamit, ilabi na kung ang mga pagkawala (losses) naggikan sa mga isyu sa pagdumala o problema sa mga ekipo sulod sa mga electric utility.
Nanawagan siya alang sa paspas nga pag-uswag sa balaodnon aron masiguro ang permanente nga pagtangtang sa systems loss charge ug mapanalipdan ang mga konsumidor batok sa posibleng pagbalhin sa maong mga gasto ngadto sa ubang bahin sa ilang bayranan. Gipahayag niya nga ang kuryente usa ka batakang panginahanglan, busa importante nga masiguro ang kasaligan nga serbisyo ug patas nga bayranan alang sa mga konsumidor.
