Gipakusgan sa gobyerno ang mga pagpangandam alang sa posibleng epekto sa “Super El Niño,” ilabi na bahin sa kakulang sa tubig ug grabeng hulaw.
Matod ni Malacañang Press Undersecretary Claire Castro, nagtigom ang mga hingtungdang ahensya niadtong Mayo 25 aron mangandam alang niini nga panghitabo sa panahon.
Diin nag-andam ang National Irrigation Administration og plano aron maminusan ang epekto niini, nga naglakip sa paggamit sa mga mapa sa ‘groundwater’, rehabilitasyon sa mga ‘solar-powered pump irrigation system’, ug pag-deploy sa mga mobile solar pump ngadto sa mga lugar nga daling maigo sa hulaw ug kulang sa tubig.
Samtang, nag-andam ang DENR alang sa seguridad sa tubig, pagpugong sa sunog sa kalasangan, ug pagdaginot sa enerhiya, samtang gisusi usab sa Department of Agriculture ang mga sistema sa irigasyon ug mga tanom nga makasugakod sa hulaw.
Gigahin usab ang pinansyal nga tabang alang sa mga mag-uuma ug mangingisda.
Ingon man nga nangandam na usab ang Department of Energy alang sa posibleng mga pagkaputol sa kuryente, samtang ang mga awtoridad sa panglawas magpatuman og mga lakang aron masiguro ang igong ‘hydration’ ug pagpabugnaw sa lawas, ingon man ang pagmonitor sa panglawas sa mga sektor nga labing bulnerable.
Gitan-aw usab sa Palasyo ug sa Department of Budget and Management (DBM) ang posibilidad sa dugang nga pondo.
