Misumite ang Registry sa International Criminal Court (ICC) sa mga dokumento ug annex, lakip ang giusab nga E-Court Protocol, kalabot sa kaso ni kanhi President Rodrigo Duterte bahin sa mga pasangil nga crimes against humanity nga may kalabotan sa iyang kampanya sa war on drugs.
Gihimo ang maong pagsumite subay sa desisyon sa ICC Trial Chamber III niadtong Setyembre 28, 2026, nga nagmando sa pag-usab sa E-Court Protocol isip kabahin sa mga proseso sa korte.
Sumala sa ICC, ang Registry usa ka neutral nga sanga sa korte nga naghatag og administrative ug judicial support sa tanang sanga niini.
Lakip sa mga responsibilidad niini ang pagdumala sa mga rekord sa korte, paghubad ug interpretasyon, legal nga tabang, suporta sa mga abogado, biktima ug saksi, ingon man ang mga serbisyo sa seguridad ug uban pang operasyon sa korte.
Samtang, gibaliwala sa Trial Chamber III ang hangyo sa kampo ni Duterte nga ipailalom sa expert verification ang mga ebidensiya nga gikan sa open-source ug user-generated content nga isumite sa chamber.
Giuyonan hinuon sa chamber ang hangyo sa prosekusyon nga maghimo og URL metadata field aron mas sayon nga mailhan ang mga URL nga nalambigit sa open-source nga ebidensiya, lakip ang impormasyon kung kanus-a kini nakuha o natala.
