Gikatahong wala na’y plano si kanhi Senador Antonio Trillanes IV nga motambong sa impeachment trial.
Nahitabo kini human siya mi-atras isip witness alang sa House Prosecution panel usa ka tahas nga unta iyang dawaton kalabot sa giingong wala mapasabot o tinago nga bahandi ni Bise Presidente Sara Duterte.
Sa dihang ipangutana ang kanhi senador kung aduna pa ba siya’y intensyon nga motambong sa pagdungog uban sa House panel nga kaniadto iyang gikuyogan.
Tubag niini nga wala siyay plano nga motambong, tungod kay mahimong tan-awon kini nga daw gipugos niya ang iyang kaugalingon sa nagpadayon nga mga proseso.
Dugang niini, nasayod na ang defense team sa mga ebidensya nga iyang ipresentar human sa iyang bag-ohay nga press conference; busa, sigurado nga buhaton nila ang tanan aron gub-on ang iyang testimonya kung motunga siya isip saksi.
Sa pagkakaron, ang tinguha lamang sa senador mao nga bantayan pag-ayo sa publiko ang dagan sa pagdungog ubos sa pagpangulo ni Senator-Judge Chiz Escudero, kinsa nagsilbi nga presiding officer.
Kahinumduman nga kaniadto, si Senador Trillanes mitungha atubangan sa House Justice Committee sa dihang naghisgot kini bahin sa “sufficiency of grounds” o igong basehan alang sa impeachment complaint batok kang Bise Presidente Sara.
