Gipagawas na sa Department of Tourism (DOT) ang opisyal nga awit alang sa ASEAN 2026, nga gipangulohan sa P-pop group nga SB19 isip performers.
Ang awit nga “Together in Motion” gi-compose ni Anya Lagman ug gi-arrange nila Jimmy Antiporda ug Louie Ocampo.
Gipasiugda sa maong awit ang panaghiusa, kooperasyon ug hiniusang pag-uswag sa mga nasod sa Southeast Asia, nga nahiuyon sa tema sa Pilipinas isip ASEAN Chair karong 2026 nga “Navigating Our Future, Together.”
Sa music video nga gipagawas sa Tourism Philippines, gipakita ang nagkadaiyang kultura, katahom ug mga talan-awon sa mga nasod nga sakop sa ASEAN, uban sa mensahe sa paghiusa sa rehiyon.
Kahinumduman nga Pilipinas maoy chair sa ASEAN karong 2026 ug maoy host sa ika-49 nga ASEAN Summit, diin magkatigom ang mga lider sa rehiyon aron hisgutan ang mga isyu ug prayoridad nga may kalabotan sa ASEAN.
Ang “Together in Motion” mahimo nang mapaminaw ug malantaw pinaagi sa opisyal nga mga plataporma sa Tourism Philippines.
