Gipasiugda sa Philippine Red Cross-Cebu Chapter ang importansya sa pagmintinar og stable nga suplay sa dugo sa mga blood bank ug mga ospital aron masiguro nga matubag dayon ang panginahanglan sa mga pasyente, ilabina panahon sa emerhensya.
Sumala ni Dr. Era Tudtud, Blood Bank Manager, importante nga kanunay adunay igo nga blood supply tungod kay dili sama sa ubang medical supplies ang dugo nga mahimong himoon o manufactured.
Nagdepende lamang ang suplay sa dugo sa mga boluntaryong donors, ug dili kanunay sayon ang pagpangita og donors, ilabina panahon sa kalamidad, baha, outbreak ug uban pang sitwasyon nga mahimong makaapekto sa blood donation activities.
Samtang giingon ni Atty. Maria Vera De Jesus, Administrator sa Philippine Red Cross-Cebu Chapter, nga adunay koordinasyon tali sa national headquarters ug sa ubang Red Cross chapters aron makatabang sa pagkompleto sa blood supply kung adunay kakulang sa usa ka lugar.
Lakip sa mga blood stations sa Visayas nga mahimong ma-coordinate alang sa blood supply mao ang naa sa Lapu-Lapu, Iloilo, Southern Leyte ug Ormoc.
Gipasabot usab ni Tudtud nga ang usa ka unit sa donated blood mahimong maproseso ngadto sa nagkalain-laing blood components sama sa red blood cells, platelets ug plasma, nga adunay tagsa-tagsa ka gamit sa mga pasyente.
Ang red blood cells, pananglitan, maoy nagdala sa oxygen ngadto sa nagkalain-laing bahin sa lawas. Importante usab ang platelets sa mga pasyenteng adunay bleeding o ubos nga platelet count, lakip na ang pipila ka kaso sa dengue, depende sa medical assessment sa pasyente.
Samtang gi-emphasize ni Charlene Mae Watin, Donor Recruitment Officer, nga dako kaayo ang mahimong epekto sa usa lamang ka blood donor tungod kay ang iyang donasyon mahimong makatabang sa labaw sa usa ka pasyente human maproseso ngadto sa nagkalain-laing blood components.
Tungod niini, padayon ang panawagan sa Philippine Red Cross-Cebu Chapter sa publiko nga mahimong regular nga blood donors aron mapadayon ang igo ug stable nga suplay sa dugo nga magamit sa mga nanginahanglan, ilabina panahon sa emergency.
