Nagtala ang Pilipinas og makasaysayanong resulta sa ika-20 nga Asian Games sa Aichi-Nagoya, Japan, diin nakakuha kini og kinatibuk-ang 29 ka mga medalya sa pagtapos sa kompetisyon niadtong Domingo, Oktubre 4.
Kini ang pinakadaghang medalya nga nakuha sa nasod sulod sa unom ka dekada, sukad pa sa 1966 nga edisyon sa maong dula didto sa Bangkok, Thailand.
Nakuha sa Pilipinas ang ika-17 nga pwesto sa kinatibuk-ang talaan, uban sa national team nga nakakuha og upat ka gold, siyam ka silver, ug 16 ka bronze nga mga medalya.
Bisan tuod wala malabwan sa nasod ang rekord nga upat ka gold medals nga natala sa Jakarta-Palembang (2018) ug Hangzhou, China (2023), giisip gihapon sa Philippine Olympic Committee (POC) nga usa ka kalampusan ang maong kampanya.
Matod ni POC President Abraham Tolentino, wala nadugangan ang gidaghanon sa gold, apan nadugangan ang gidaghanon sa silver ug bronze, diin nalabwan usab ang atong kinatibuk-ang ihap kaniadto.
Gisugdan sa “Golden boy” ug two-time Olympic gold medalist nga si Carlos Yulo ang pagpanghakot og gold medal sa nasod pinaagi sa pagdaog sa unang duha ka gold medals sa men’s artistic gymnastics floor exercise ug vault events.
Sunod nga nakakuha sa ikatulo nga gold medal sa nasod ang pole vaulter nga si EJ Obiena pinaagi sa rekord nga 5.91 metros.
Samtang, si Jeus Yape—ang representante sa nasod sa unang higayon nga gipahigayon nga mixed virtual taekwondo event—maoy nakakuha sa ikaupat nga gold medal sa Pilipinas sa Asiad. Isip pasidungog sa iyang kadaugan, gidala usab ni Yape ang bandila sa Pilipinas atol sa closing ceremony sa Asian Games.
Sa laing bahin, naghinam-hinam na ang national team alang sa sunod nga Asiad, nga gikatakdang ipahigayon sa Doha, Qatar, sa tuig 2030.
