Human sa malampusong pagdepensa sa iyang titulo sa Asian Games, nagplano ang pole vaulter nga si EJ Obiena nga mobalik sa Olympics alang sa 2028 Games sa Los Angeles, USA.
Sa wala pa mosalmot sa 2026 Asian Games sa Nagoya, Japan, nakakuha ang pole vaulter og siyam ka gold medals karong tuiga gikan sa mga kompetisyon nga gipahigayon sa Europe ug China.
Ang pagbalik ni Obiena sa Asiad nagtala og bag-ong record diin nakab-ot niya ang makasaysayanong 5.91 meter-finish nga nagtakda og bag-ong rekord sa kompetisyon ug nalabwan niini ang iyang kaugalingong rekord nga 5.90 meters nga natala sa Hangzhou niadtong 2023.
Gipaambit usab ni Obiena ang iyang mga plano nga mobalik sa Olympics sa LA 2028 human sa iyang gihulagway nga usa ka mabungahon nga tuig.
“For me, this season has been a welcome sight to see. The last two years have been rough for me. Missing the podium in Paris, falling out of the top 10 and falling as low as 15,” matod sa pole vaulter atol sa ilang homecoming press conference niadtong Lunes.
“LA is the goal. I defended my title here, and I think I’m, like I said, I have a lot of upside. It’s just a matter of time. We will see. But again, I can’t predict the future. If I could, I would,” dugang niya.
Wala naka-podium si Obiena ug nahimutang sa ikaupat nga pwesto sa 2024 Paris Olympics. Bisan pa niini, nagpabiling determinado ug positibo ang atleta sa pagpadayon sa pag-apil sa maong sport.
