Gidakop sa mga awtoridad sa Sri Lanka niadtong Miyerkules, Oktubre 7, ang kanhi First Lady nga si Shiranthi Rajapaksa tungod sa mga alegasyon sa korapsyon nga naglambigit sa pondo nga gitagana alang sa usa ka ospital sa mga bata.
Ang kaso naglambigit sa donasyon nga 10 ka milyon ka rupees kon mokabat sa $30,300 nga nakolekta sa charity ni Rajapaksa, ang Siriliya Saviya, alang sa usa ka positron emission tomography (PET) scanner nga gamiton sa usa ka ospital sa kanser nga nagtambal sa mga batang Sri Lankan.
Nasuta sa mga naunang imbestigasyon nga ang maong scanner usa diay ka donasyon gikan sa gobyerno sa China; bisan pa niini, nagpadayon ang charity ni Rajapaksa sa pagpangayo og mga donasyon, nga giingong wala gigamit sa hustong paagi.
Ang 73-anyos nga asawa ni kanhi Presidente Mahinda Rajapaksa gidakop sa iyang pinuy-anan sa Colombo ug gikatakdang moatubang sa korte, sumala sa Commission to Investigate Allegations of Bribery or Corruption (CIABOC).
Nagpakita ang mga taho nga atua siya sa Singapore alang sa medikal nga pagtambal sukad niadtong Septiyembre 16, sa dihang nagpagawas ang korte og mando nga nag-require kaniya sa paghatag og pahayag bahin sa iyang charity.
Mibalik si Rajapaksa sa Sri Lanka niadtong Lunes aron magpasaka og petisyon nga mosupak sa iyang pagkaaresto, bisan pa nga ang hearing alang sa anticipatory bail gikatakda karong Oktubre 12.
Gihimakak sa kanhi First Lady ang mga alegasyon batok kaniya, ug nag-insistir nga ang pondo nga nakolekta sa iyang charity wala gigamit sa sayop nga paagi.
Ang pamilyang Rajapaksa nangulo sa Sri Lanka sulod sa hapit duha ka dekada, diin nagkalain-laing miyembro sa pamilya ang nalambigit sa mga alegasyon sa korapsyon.
Niadtong 2022, ang igsoon ni Mahinda nga si Gotabaya Rajapaksa gipalagpot gikan sa pagka-presidente human sa kaylap nga mga protesta sa mga Sri Lankan.
