Gipakusgan sa dakbayan sa Mandaue ang mga pagpangandam alang sa Adlaw sa mga Santos ug Adlaw sa mga Kalag karong Nobyembre 1 ug 2, diin nagpatuman ang nagkalain-laing buhatan sa siyudad ug mga ahensya og mga lakang aron masiguro ang kaluwasan sa publiko ug hapsay nga pagsaulog niining mga adlawa.
Matud ni Buddy Alain Ybañez, ang pangu sa City Disaster Risk Reduction and Management Office (CDRRMO), nga ang mga pagpangandam naglakip sa pagtubag sa emerhensya, kaluwasan sa publiko, pagpugong sa sunog, medikal nga tabang, ug pagdumala sa trapiko. Apil niini ang partisipasyon sa Mandaue City Police Office (MCPO), Bureau of Fire Protection (BFP), Traffic Enforcement Agency of Mandaue (TEAM), mga hingtungdan nga barangay, ug uban pang mga ahensya.
Una usab niini, si Mayor Thadeo “Jonkie” Ouano nangulo sa usa ka inspeksyon niadtong Oktubre 13, aron susihon ang kaandam sa mga administrador sa sementeryo ug mahibal-an ang mga gikinahanglang lakang agi’g pangandam sa gipaabot nga pagdagsang sa mga bisita.
Diin ang inspeksyon naglangkob sa upat ka sementeryo sa Barangay Guizo: Grosmar Memorial Garden, Manpark Cemetery, St. Joseph’s Roman Catholic Cemetery, ug ang Mandaue City Municipal Cemetery.
Matod ni Ybañez, nagplano ang siyudad nga magbutang og mga medical assistance station ug police assistance desk. Samtang, ang mga response team sa barangay ug mga tanod motabang sa pagbantay sa palibot sa sementeryo, paggiya sa mga bisita, ug pagdumala sa dagan sa mga tawo.
Ingon man ang BFP ug uban pang mga responder magbantay usab batok sa posibleng mga risgo sa sunog, ilabi na sa mga lugar diin magdagkot og kandila ang mga bisita.
Susihon usab sa mga awtoridad ang gidili nga mga butang, lakip ang mga hinagiban ug mga butang nga makahubog, aron malikayan ang mga kasamok sa panahon sa pag-obserbar. Ingon man ang mga tagdumala sa sementeryo gilauman usab nga maghimo sa ilang kaugalingon nga pagpangandam.
Gipaambit usab ni Ybañez nga ang siyudad mohimo og pre-deployment coordination meeting uban sa mga opisyal sa barangay, kapulisan ug ubang hingtungdan nga ahensya sa dili pa ang Kalag-Kalag aron ma-finalize ang personnel assignments ug operational arrangements.
