Naglisod ang mga residente ug estudyante sa pagtabok sa Suba sa Bonbon nga nagdugtong sa Barangay Luca ug Barangay Lamesa sa Balamban, Cebu, tungod sa naguba nga taytayan ug pagsaka sa tubig panahon sa kusog nga pag-ulan.
Sa pakighinabi sa Bombo Radyo Cebu, gibutyag ni Gerald John Sasing nga naguba ang maong taytayan sukad sa pag-igo sa Bagyong Tino sa miaging tuig.
Matod niya, nagpabiling humok ug dili lig-on ang balasong yuta, nga nakapalisod sa pagtabok, ilabi na sa mga naggamit og motorsiklo.
Mas gikabalak-an ang kahimtang sa mga estudyante nga kinahanglan motabok aron makaeskwela ug makapauli, kon diin kung mobaha ang suba, mameligro ang ilang kaluwasan.
Wala usab silay laing alternatibong agianan, hinungdan nga napugos silang mogamit sa motabok bisan pa sa peligro.
Gilaoman nila ang dali nga aksiyon sa mga hingtungdan aron mahatagan og luwas nga agianan ang mga estudyante ug ang tibuok komunidad.
Tungod sa padayon nga kalisod, nabalaka ang mga residente sa ilahang kahimtang ug sa posibleng aksidente nga mahimong mahitabo, ilabi na kon mosamot ang pag-ulan ug mosaka ang tubig sa suba.
Bisan pa man nga kasagaran nang masinati sa maong lugar ang pagbaha, misamot ang kalisod sa pagtabok tungod sa halos adlaw-adlaw nga pag-ulan.
Tungod niini, naglaom ang mga residente nga mapadali ang pagresponde sa lokal nga pangagamhanan ug ang pag-ayo sa taytayan aron adunay mas luwas nga agianan alang sa mga estudyante ug sa tanang molabay.
Gipasiugda sa maong kahimtang ang panginahanglan sa dinaliang pagtagad sa problema aron mapanalipdan ang kaluwasan sa komunidad ug malikayan ang posibleng disgrasya panahon sa pagbaha.
