Gikonsiderar karon sa kagamhanan sa dakbayan sa Sugbo ang pagpagawas og direktiba nga magmando sa mga barangay nga pahugtan ang pagpatuman sa balaod batok sa pagsunog og basura sa mga komunidad, taliwala sa padayon nga problema sa pagtaas sa kalidad sa hangin sa Metro Cebu.
Kini human sa pag-assess sa Environmental Management Bureau Region Seven o EMB-7, diin gipatin-aw niini nga ang kasamtangang problema sa kalidad sa hangin sa Metro Cebu naggikan sa mga emisyon sulod sa rehiyon, ug dili tungod sa sunog sa kalasangan sa Indonesia.
Lakip sa mga hinungdan niini ang daghang sakyanan, mga pabrika ug uban pang kalihokan sa ekonomiya nga nagpagawas og emisyon sa hangin.
Apan matud sa kagamhanan, dili mahimong hunongon lang sa siyudad ang mga kalihokan sa ekonomiya aron mapakunhod ang polusyon, busa gikonsiderar ang mas hugot nga pagpatuman sa balaod batok sa pagsunog og basura.
Base sa monitoring kagahapon, Biyernes, Oktubre 14, alas kwatro sa hapon, misaka sa usab sa ngadto 172 ang Air Quality Index o AQI sa Metro Cebu Monitoring Station, nga nagpabilin sa kategoryang “Very Unhealthy.”
Matud ni Cebu City Office-in-Charge Public Information Officer Jesson Morata, gitun-an na sa siyudad ang maong direktiba aron mas hugot nga mamonitor ug mapugngan ang pagdaob sa mga basura ug uban pang kalihokan nga nakadugang sa polusyon sa hangin.
Lakip usab sa gisugyot nga lakang ang pagsiguro nga magamit og tarong ang mga Materials Recovery Facility o MRF sa matag barangay, ingon man ang regular nga pagkolekta sa basura aron dili na mapugos ang mga residente sa pagsunog niini.
Pinaagi sa planong direktiba, gilaoman nga mas mapalig-on ang pagmonitor sa mga barangay batok sa pagsunog og basura ug masiguro ang hustong pagdumala niini.
Gibase usab ang maong lakang sa Republic Act 9003 o Ecological Solid Waste Management Act of 2000, nga nagdili sa pagsunog sa basura, malata man kini o dili.
Apan sumala kang Morata, magpahigayon ang mga barangay og intelligence gathering aron mailhan ang mga lumulupyo nga nalambigit sa maong kalihokan.
Dugang pa niya, kinahanglan usab nga tarungon ang pagkolekta, paglabay ug pag-segregate sa basura, lakip ang pagdasig sa mga residente nga mosunod sa hustong waste segregation.
Nagpadayon ang pag-awhag sa publiko nga likayan ang mga kalihokan nga makadugang sa polusyon, ilabina ang pagsunog sa basura, samtang gipalig-on sa kagamhanan ang mga lakang alang sa mas maayong pagdumala sa basura ug pagkontrol sa mga tinubdan sa polusyon.
