Nanawagan ang Cebu Electricity Rights Advocates sa Kongreso nga ipatuman ang parehas nga 5.5% system loss cap alang sa tanang power distributor sa nasud, lakip ang mga electric cooperative, aron maminusan ang bayranan sa kuryente sa mga konsumidor.
Matod ni Nathaniel Chua, convenor sa grupo, sa iyang pakighinabi sa Bombo Radyo Cebu, giaprobahan na sa House Committee on Energy ang mao nga balaod nga nagtumong sa pagtangtang sa system loss charges.
Apan matod ni Chua, dili angay nga tangtangon ang tanang technical losses tungod kay kabahin kini sa pag-apod-apod sa kuryente.
Hinuon, kinahanglan nga maminusan ang mga malikayang pagkawala sa kuryente o nontechnical losses.
Giklaro niini, nga mahimong moabot sa 12% ang gitugot nga system loss cap sa mga electric cooperative, samtang 6% sa mga pribadong distribution utility.
Gikuwestiyon usab sa grupo ang gisugyot nga tulo ka tuig nga transition period sa pagpatuman sa uniform nga 5.5% system loss cap.
Matod ni Chua, kinahanglan nga pauswagon sa mga power distributor ang ilang operasyon aron makontrol ang system losses ug maminusan ang dugang nga gasto sa mga konsumidor.
Nanawagan ang grupo sa Kongreso nga susihon ang transition period ug ipatuman ang mas patas nga limitasyon sa system loss aron mapanalipdan ang mga konsumidor batok sa sobra nga bayranan sa kuryente.
