Namatay ang usa ka Katolikong pari sa Guayaquil, Ecuador human maigo sa ulo sa dakong kahoy nga krus nga nahulog gikan sa bungbong samtang nagmisa.
Giila sa Archdiocese of Guayaquil ang pari nga si Father Patricio Alfredo Sánchez Molinari, nga nagserbisyo sa Simbahan sa Perpetual Relief sa Central Vicariate.
Nahitabo ang insidente niadtong Oktubre 17 atol sa Misa nga gi-livestream sa social media.
Makita sa video ang pagkahulog sa krus gikan sa luyo sa altar ug pag-igo niini sa ulo sa pari.
Daling nangayo og tabang ang mga tawo nga didto sa simbahan. Madungog usab sa livestream ang pagtawag og ambulansya sa wala pa naputol ang sibya.
Nagpahayag og kasubo ang archdioceses ug nagpaabot og pahasubo sa pamilya, mga higala, ug komunidad nga gialagaran sa pari.
Sa pagkakaron, wala pa mahibaloi ang hinungdan sa pagkahulog sa krus, samtang wala pa usab magpagawas og opisyal nga pahayag ang lokal nga mga awtoridad bahin sa insidente.
