Labing menos 16 ka tawo ang namatay human miigo ang magnitude-7 nga linog sa Tibet Autonomous Region sa China niadtong Huwebes sa gabii, Oktubre 22.
Base sa mga taho, 65 ka tawo ang naangol, samtang dili momenos sa 339 ka balay ug 20 ka kuwadra o sudlanan sa kahayupan ang nangagun-ob sa siyudad sa Nagqu.
Ang linog natala pasado alas 10:33 sa gabii (oras sa China), diin ang sentro niini nahimutang 191 ka kilometro sa amihanan-sidlakan sa Nagqu, sa giladmon nga 18 ka kilometros.
Nagpadala ang mga awtoridad og kapin sa 1,600 ka personahe aron motabang sa mga operasyon sa pagpangita ug pagluwas, ug aron mang-apod-apod og mga gikinahanglang suplay ngadto sa mga apektadong residente.
Lakip sa mga butang nga gipadala sa lugar mao ang mga temporaryong kapuy-an, tolda, mga katre nga mapilo, flashlight, ug mga sinina nga makapainit sa lawas.
Gipahibalo usab sa mga awtoridad nga adunay gatusan ka mga aftershock human sa kusog nga pagtay-og, samtang nagpadayon ang pagsusi sa kadaot ug ang mga paningkamot sa pagtabang sa mga residente nga naapektuhan sa kalamidad.
Sumala sa mga taho, kini ang pinakakusog nga linog nga miigo sa rehiyon sulod sa milabay nga lima ka tuig.
Nagpadayon pa ang pagmonitor ug ang mga operasyon sa paghatag og hinabang sa maong lugar.
