Magsugpd na sa pagdawat sa mga kauban sa pasyente sa Vicente Sotto Memorial Medical Center (VSMMC) ang gitukod nga Pasilongan Center, karong adlawa, Martes, Oktubre 27.
Kini human pormal nga giablihan gahapong adlawa, ug nahimutang kini sa Don Mariano Street duol sa Larsian sa Siyudad sa Sugbo, ug ang temporaryong kapasilongan nagtanyag og mga higdaanan ug luna nga katulgan alang sa mga tawo nga kauban sa mga pasyente sa VSMMC.
Diin kini nga inisyatibo, nga gipangulohan ni Gov. Pamela Baricuatro, gihimo human adunay mga taho nga ang mga paryente ug kauban sa mga pasyente napugos sa paghigda sa gawas sa ospital tungod sa pagpatuman sa polisiya sa tambalanan nga “usa ra ka bantay matag pasyente.”
Giawhag usab sa gobernadora sa mga mogamit sa pasilidad nga ipabilin nga hapsay ug luwas, ingon man nga respetuhon ang giya sa tambalanan.
Mitambong usab sa inagurasyon sila si Dr. Gerardo M. Aquino Jr., ang Medical Center Chief II sa VSMMC, uban sa iyang team; Provincial Administrator Atty. Ace Durano; Capitol Piso Health Consultant Dr. Nikki Baricuatro Catalan-Vizcayno; ug uban pang mga pangulo sa mga departamento sa kagamhanang probinsyal.
