Gipatuman sa Siyudad sa Tobaco sa Albay ang mandatory nga pagbakwit alang sa mga residente niini human mibuto ang Bulkang Mayon.
Sa usa ka taho gipabakwit ang mga residente nga anaa sulod sa unom ka kilometro nga anaa sa (permanent danger zone) sa Bulkang Mayon, samtang gisuspinde usab ang mga klase sa mga apektadong lugar.
Dagkong mga panganod sa abo ug aso ang misaka gikan sa Bulkang Mayon, ug gipataas sa mga awtoridad ngadto na sa Alert Level 3.
Matod sa PHIVOOLCS, dili pa matino kung kini nga matang sa eksplosibong pagbuto usa ba ka higayon nga panghitabo o kung sundan pa kini og uban pa, ilabi na nga ang ilang mga sukaranan sa pagmonitor sa Mayon wala pa gipaubos.
Nagpasidaan ang PHIVOLCS sa mga residente bahin sa mga risgo sa (ashfall) human sa pagbuto.
Samtang, nakasinati og ashfall ang mga residente sa Guinobatan, hinungdan nga nagsul-ob sila og mga face mask, samtang ang pipila ka mga tindahan kinahanglang tabunan ang ilang mga bintana.
Nagpagawas ang Department of Health og pipila ka mga pahinumdom atol sa ashfall, diin giawhag ang mga residente nga magsul-ob og N95 mask, basang panapton, o doble nga face mask aron mapanalipdan ang ilang kaugalingon.
Giawhag usab ang mga residente nga magmaneho og hinay, sigurohon nga adunay fluid alang sa windshield wiper, ug i-on ang mga headlight aron mas makita ang palibot.
