Posibleng molungtad og gibana-banang duha ka tuig o mas dugay pa ang pagdungog sa kaso batok kang kanhi Presidente Rodrigo Duterte sa International Criminal Court (ICC).
Kini ang gipaambit ni Atty. Gilbert Andres, usa ka ICC-accredited lawyer, diin ang gidugayon sa paghusay mahimong lugwayan, depende sa dagan sa mga pagdungog ug sa katulin sa pagpresentar sa mga saksi ug ebidensya sa duha ka habig.
Si Atty. Andres nagsilbi isip usa sa mga legal nga representante sa mga biktima sa drug war sa miaging administrasyon. Matod niya, mahinungdanon ang desisyon sa internasyonal nga korte nga mandoan ang personal nga pagtambong sa kanhi presidente.
Gilauman usab nga ang pipila ka mga paryente sa mga biktima nga personal nga motambong sa serye sa mga pagdungog, nga ipahigayon sa The Hague—ang headquarter sa ICC.
Gipasabot ni Atty. Andres nga tungod kay usa lang ka matang sa internasyonal nga krimen ang giatubang sa kanhi presidente sa Pilipinas, ang kaso medyo simple lang kon itandi sa ubang mga kaso nga gidumala kaniadto sa maong international tribunal.
Samtang, sa pagsugod sa paghusay karong Nobyembre 30, gilauman nga pormal nga basahon ngadto sa kanhi presidente sa Pilipinas ang mga kumpirmadong kaso batok kaniya, ug pangutan-on siya kon unsa ang iyang tubag (plea) niini.
Human niini, mosunod ang mga pasiunang pahayag gikan sa prosekusyon, sa mga legal nga representante sa mga biktima sa gubat batok sa droga, ug sa grupo sa mga abogado sa depensa sa kanhi presidente.
Sunod niini, ipresentar sa prosekusyon ang ilang unang lima ka mga saksi, diin ang mga proseso gikatakdang ipahigayon gikan sa Nobyembre 30 hangtod sa Disyembre 18, 2026.
