Opisyal nang giretiro sa Philippine Air Force (PAF) ang tibuok pundok sa mga helicopter nga UH-1H “Huey” aron hatagan og dalan ang pag-upgrade ug modernisasyon sa mga kagamitan sa air force sa nasud.
Matod pa sa tigpamaba sa PAF nga si Col. Alvin Jay Capinguian, aduna pa’y nahabilin nga 6 ka helicopter nga UH-1H sa imbentaryo sa PAF, nga pulos nahimutang sa 205th Tactical Helicopter Wing (THW) sa Mactan, Cebu.
Kauban niining pagretiro mao ang opisyal nga pagbalhin sa mga rekord ug sa mismong mga unit sa maong mga aircraft gikan sa 205th THW ngadto sa Air Logistics and Support Command.
Gipasabot ni Col. A.S. Capinguian nga ang prayoridad sa Philippine Air Force mao ang pagbalhin ngadto sa mas moderno ug haom nga mga kagamitan alang sa kasamtangang palibot sa operasyon. Diin ang Sikorsky S-70i Black Hawk mao na ang mopuli sa mga tahas ug katungdanan nga kaniadto gihimo sa UH-1H Huey.
Dugang pagpasabot niya nga pulihan na kini sa mas modernong Black Hawk helicopters nga mas kasaligan ug mas angay sa kasamtangang operasyon sa militar.
Mas labaw usab ang Black Hawk sa aspeto sa kaluwasan ug komunikasyon tungod kay aduna kini duha ka makina, samtang usa lamang ang makina sa Huey.
Gipahibalo usab ni Capinguian nga nahuman na ang pagpalit sa maong mga helicopter, diin ang unang batch nga 16 ka units gisugdan niadtong 2019, samtang ang ikaduhang batch nga 32 ka units gisugdan niadtong 2022.
Sa pagkakaron, ang Philippine Air Force adunay 47 ka helikopter nga Black Hawk nga gipakatap sa nagkalain-laing probinsya sa tibuok nasud, samtang ang headquarter sa 205th THW nahimutang sa Cebu. via Bombo Crislee Adlawan
