PROVINCE OF BOHOL- Gidasig sa Bohol Office of Provincial Agriculture ang mga mag-uuma sa lubi nga mosagop sa intercropping o integrated farming system aron madugangan ang ilang tinubdan sa kita.
Kini pinaagi sa pagtanom og lain-laing klase sa mga tanom ilalom sa mga punoan sa lubi, nga mahimong dugang panginabuhian samtang naghulat sa pamunga sa mga lubi.
Matod ni Teopisto Jumawid, Coconut Focal Person sa Bohol Office of Provincial Agriculture, dili lamang lubi ang mahimong itanom sa mga kalubihan, kondili mahimo usab kining tamnan og cacao, kape, mga utanon, ubi ug uban pang klase sa mga prutas ug industrial crops.
Pinaagi niini, mapahimuslan sa mga mag-uuma ang luna ilawom sa mga punoan sa lubi ug makadugang sa ilang kita gikan sa ubang mga produktong panguma.
Gipasabot usab ni Jumawid nga naghatag ang ilang opisina og mga seedlings ngadto sa mga mag-uuma aron masuportahan ang pagpatuman sa maong farming system.
Lakip usab sa ilang mga programa ang paghatag og technical assistance ug mga training, ilabi na sa hustong pagpananom ug pag-atiman sa cacao ug kape aron mapalambo pa ang produksiyon ug kita sa mga mag-uuma.
Gisugdan na usab ang maong inisyatibo sa lungsod sa San Isidro, diin adunay mga mag-uuma nga mipakita og interes sa pagpatuman sa intercropping system.
Padayon ang Bohol Office of Provincial Agriculture sa pagpalig-on sa suporta ngadto sa sektor sa lubi, dili lamang pinaagi sa pagpauswag sa produksiyon niini, kondili pinaagi usab sa pagpangita og dugang panginabuhian nga makatabang sa pagpalambo sa kita sa mga mag-uuma.
