Gidakop sa Florida niadtong Biyernes, November 6, 2026, si Thomas Markle, tungod sa giingong paghupot og child pornography, sumala sa mga report gikan sa media sa Britanya ug Estados Unidos.
Matod sa pipila ka report sa gawas sa nasud, si Markle, gidakop sa mga FBI Agent didto sa usa ka retirement home sa habagatang bahin sa Estados Unidos, diin siya nagpuyo.
Nahitabo ang pagdakop human giingong nakakaplag og mga child pornography materials sa kanhi gipuy-an ni Markle sa Pilipinas ug sa usa ka storage unit nga iyang giabangan sa Mexico.
Ang iyang anak nga lalaki, si Thomas Markle Jr., mihatag kaniadto og mga digital device nga gituohang adunay sulod nga mga materyal nga nakalapas sa Anti-Online Sexual Abuse or Exploitation of Children and Anti-Child Sexual Abuse or Exploitation Materials Act.
Nakakuha ang mga awtoridad og warrant aron susihon ang datos gikan sa siyam ka mobile phone, tulo ka SD card, lima ka hard drive, ug usa ka kamera, lakip na ang uban pang mga non-digital devices.
Kasamtangan usab nga anaa karon sa Sugbo ang mga FBI agents sa US, nga nakig-alayon sa lokal nga kapulisan.
Kahinumdoman nga si Markle Sr. nagpuyo kaniadto sa usa ka high-rise apartment sa Dakbayan sa Sugbo, gikan sa Enero 2025 hangtod sa Mayo 2026.
