Magpabilin nga lima ka tuig ang termino sa katungdanan sa mga opisyal sa barangay ug Sangguniang Kabataan (SK), human gipamatud-an sa Korte Suprema nga “constitutional” ang balaod nga nagpalugway sa ilang termino.
Gibasura sa Korte Suprema ang petisyon nga gisang-at sa election lawyer nga si Atty. Romulo Macalintal, batok sa Republic Act No. 12326, nga nag-usab sa naunang upat ka tuig nga termino sa mga napili nga opisyal sa barangay ug SK.
Sa usa ka desisyon nga gisulat ni Associate Justice Rodil Zalameda, gipasabot sa Korte nga ang maong balaod nagtakda sa gidugayon sa termino sa mga opisyal, imbes nga nag-postpone lang sa eleksyon.
Tungod niini, ang sunod nga Barangay and Sangguniang Kabataan Elections (BSKE) ipahigayon sa Nobyembre 2028, human niini, ang mga mosunod nga eleksyon ipahigayon matag lima ka tuig.
Kahinumdoman nga gipirmahan ni Presidente Ferdinand Marcos Jr. ang RA 12326 niadtong Septyembre 24, 2026. Ubos niini nga balaod, ang termino sa mga opisyal sa barangay ug SK gipalugway gikan sa upat ngadto sa lima ka tuig, nga miresulta sa pag-usab sa iskedyul sa eleksyon—nga orihinal untang gitakda sa Nobyembre 2026—ngadto sa Nobyembre 2028.
Gihagit ni Macalintal kini nga kausaban pinaagi sa pagpasaka og petisyon sa Korte Suprema aron kuwestiyonon ang legalidad niini. Sa iyang petisyon, gikuwestiyon niya ang pagpalugway sa termino sa mga naglingkod nga opisyal nga wala una nagpahigayon og eleksyon, nga naghisgot sa katungod sa mga lungsoranon sa pagpili sa ilang mga lider sa barangay ug sa Sangguniang Kabataan (SK).
Bisan pa niini, gibasura sa Korte Suprema ang iyang petisyon ug gipamatud-an ang kabalido sa RA 12326.
