Gipahibalo sa Department of Budget and Management (DBM) nga ang mga empleyado sa gobyerno makadawat sa ilang Year-End Bonus ug P5,000 nga cash gift dungan sa ilang unang sweldo alang sa bulan sa Nobyembre.
Hugot usab nga nagpahinumdom ang DBM sa tanang ahensya nga sundon ang gitakdang schedule alang sa pagpagawas niining mga benepisyo.
Sa usa ka pahayag nga gipagawas, gikumpirma sa DBM nga nakapagawas na kini og P82.998 bilyones nga pondo alang sa Year-End Benefits sa mga kwalipikadong sibilyan, militar, ug unipormadong kawani.
Ingon man nga hugot nga gimandoan sa ahensya ang mga hingtungdan nga opisina nga likayan ang paglangan sa mga bayad pinaagi sa pagproseso niini nga gilain o sa mas ulahi nga panahon.
Subay sa DBM Budget Circular No. 2024-3, ang mga kwalipikadong empleyado sa gobyerno adunay katungod nga makadawat og Year-End Bonus nga katumbas sa usa ka bulan nga batakang sweldo (basic salary) base sa kahimtang niadtong Oktubre 31, 2026, uban ang P5,000 nga cash gift.
Matod ni Budget Secretary Kim Robert de Leon, ang pondo naapod-apod na ngadto sa mga ahensya, nga kinahanglang mosiguro nga madawat sa mga empleyado kini nga mga benepisyo dungan sa ilang unang sweldo sa Nobyembre.
“Labaw sa tanan, kini ang among paagi sa pag-ila ug pagpasalamat sa atong mga kawani sa gobyerno tungod sa ilang kakugi, dedikasyon, ug padayon nga pagserbisyo sa katawhang Pilipino,” dugang niya. Gipahinumdoman pag-usab sa DBM nga ang tukma sa panahon nga pagpagawas niining mga benepisyo usa ka obligasyon ubos sa kasamtangang mga polisiya sa gobyerno mahitungod sa kompensasyon.
Giawhag niini ang mga ahensya nga motuman sa gitakdang iskedyul sa pagbayad.
Gikan sa kinatibuk-ang alokasyon, ang P73.449 bilyones gigahin alang sa Year-End Bonuses, samtang ang P9.549 bilyones alang sa mga cash gift.
Aron mahimong kwalipikado alang sa tibuok benepisyo, ang mga empleyado sa gobyerno kinahanglang nakaserbisyo na og labing menos upat ka bulan—o 120 ka adlaw—tali sa Enero 1 ug Oktubre 31, 2026.
Kinahanglan usab nga nagpabilin sila sa serbisyo sa gobyerno hangtod sa Oktubre 31.
Kining mga rekisitos sa kwalipikasyon magamit sa mga empleyado nga naghupot og regular, kontraktwal, o kaswal nga mga posisyon sulod sa nasyonal ug lokal nga gobyerno. Apil usab niini ang mga indibidwal nga mikuha og awtorisado ug binayran nga leave of absence.
Giklaro sa DBM nga ang pondo alang niini nga mga benepisyo hingpit nang gipagawas ngadto sa mga ahensya sa pagsugod sa fiscal year 2026.
Hinuon, ang aktuwal nga petsa sa pagbayad magdepende sa iskedyul sa payroll sa matag ahensya, basta ang duha ka benepisyo ipagawas dungan sa unang pagbayad sa sweldo karong Nobyembre.
