Gihulagway nga ‘total failure’ ang presentasyon sa depensa sa ilang unang saksi nunot sa pag-atubang sa unang saksi, nga si Davao City Assessor Engr. Jaime Adalin—kinsa napakyas sa pagtubag direkta sa mga pangutana sa prosekusyon ug daw naglikay sa mga mahinungdanong isyu nga kinahanglang mapamatud-an sa korte.
Matod sa tigpamaba sa prosekusyon ug kanhi Representante sa Surigao del Norte nga si Robert Ace Barbers, ang mga tubag ni Adalin nagpakita lamang nga ang kabug-aton sa ebidensya nga gipresentar sa prosekusyon batok kang VP Sara—may kalabotan sa mga alegasyon sa bahandi nga wala mahatagi og katin-awan—nagpabiling lig-on ug dili matarug.
Basi sa pagsusi sa prosekusyon, ang depensa nagpresentar og huyang nga saksi nga daw nag-antos sa “selective amnesia” o pinili nga pagkalimot.
Nagpasidaan usab si Barbers nga ang mga saksi sa depensa mahimong atubangon og mga kaso sa perjury o pagpamakak ubos sa panumpa kung puro bakak lamang ang ilang isulti samtang naghatag og testimonya sa korte.
Nahimong sentro usab sa atensyon ang ulahing bahin sa pagpangutana sa pribadong piskal nga si Atty. Benjamin Tolosa Jr. ngadto kang Davao City Assessor Engr. Jaime Adalin tungod kay wala na mahinumdom si Adalin ang giingong biyahe niini paingon sa China niadtong Nobyembre 2025.
Atol sa cross-examination sa impeachment trial batok kang Bise Presidente Sara, nangutana si Tolosa kung lakip ba si Adalin sa mga opisyal sa Siyudad sa Davao nga mibiyahe paingon sa China—diin ang tanang galastuhan gisuportahan, matod pa, sa Konsulado sa China.
Nagpabilin ang baruganan ni Adalin nga dili na niya mahinumdoman ang maong panghitabo.
