Giakusahan sa France ang Islamic Revolutionary Guard Corps (IRGC) sa Iran nga maoy nagpaluyo sa sunod-sunod nga cyberattack nga miresulta sa pagsaka sa temperatura sa mga refrigerator ug freezer sa daghang supermarket sa nasud niadtong miaging bulan.
Gihulagway ni French Foreign Minister Jean-Noël Barrot ang maong pag-atake nga wala pa sukad mahitabo tungod sa kadak-on ug lebel sa agresyon niini.
Gipasidan-an usab niya nga ang mga responsable mahimong atubangon og mga silot o sanctions.
Tungod niini, gipatawag sa gobyerno sa France ang embahador sa Iran sa Paris aron ipahayag ang ilang pormal nga protesta.
Sumala sa mga report, niadtong Oktubre 11, nakontrol sa mga hacker ang software nga nagdumala sa temperatura sa cooling units sa kapin 100 ka Coopérative U supermarkets ug 180 ka branch sa Intermarché ug Netto.
Sa pipila ka lugar, giingong misaka ngadto sa 50 degrees Celsius ang temperatura sa mga freezer sulod lamang sa usa ka gabii, nga miresulta sa pagkadaot sa daghang tonelada nga mga pagkaon.
Samtang, gilusad sa piskalya sa Paris ang imbestigasyon batok sa pangulo sa offensive cyber unit sa IRGC nga nailhan nga “Shahid Kaveh,” lakip ang duha sa iyang mga kauban.
Sa laing bahin, gisalikway sa pipila ka media outlet sa Iran ang mga akusasyon sa France, ug gihulagway kini nga walay basihan.
