Patay ang duha ka mag-inahan human matanggong sulod sa ilang balay nga nasunog pasado alas tres sa kadlawon karong adlawa sa Purok Determinado, Barangay Tabunok, dakbayan sa Talisay, ganihang kadlawon, Nobyembre 10, 2026.
Giila ang mga biktima nga sila si Amalia Quizon Nebrija, 62 anyos, ug si Grace Joy Nebrija, 21 anyos.
Base sa inisyal nga impormasyon gikan sa mga otoridad, nadawat ang alarma kalabot sa sunog pasado alas tres sa kadlawon, hinungdan nga dali nga ningresponde ang Talisay City Fire Station, kauban ang Tabunok Fire Brigade ug ubang mga fire brigade gikan sa kasikbit nga mga lugar.
Pag-abot sa mga bombero, dako na ang kalayo nga mitumaw sa maong panimalay, diin nasuta nga adunay duha ka tawo nga natanggong sulod niini.
Sa pakighinabi sa Bombo Newsteam kang Kyle Isaya Ligario, usa sa mga responder, miingon kini nga dako na kaayo ang kalayo sa ilang pag-abot ug wala pa sila makahibalo nga adunay mga tawo sulod sa balay.
Nasayran lamang nila nga adunay mga biktima human nakumpirma sa mga bombero nga nakit-an ang duha ka patayng lawas sulod sa nasunog nga panimalay.
Samtang, nagpadayon ang imbestigasyon sa Talisay City Fire Station aron matino ang hinungdan sa sunog ug ang kinatibuk-ang kantidad sa danyos nga nahiaguman sa maong insidente.
