Gipakusog sa Cebu Provincial Government ang pagpangandam batok sa posibleng epekto sa El Niño pinaagi sa pag-deploy og mga water truck, pagtukod og refilling stations ug pag-ila sa mga tinubdan sa tubig alang sa mga komunidad nga posibleng maapektuhan sa hulaw.
Giawhag ni Governor Pamela Baricuatro ang mga Sugbuanon nga mag-andam daan og reserbang tubig ug pagkaon tungod sa posibleng kakulangon sa suplay.
Gibutyag usab sa gobernador nga giila na sa probinsya ang pipila ka water treatment plants sa Barili, Moalboal, Malabuyoc, Oslob ug Tabogon isip posibleng tinubdan sa tubig alang sa emergency rationing.
Samtang, magpahigayon ang Kapitolyo og water summit sa sunod semana aron hisgutan ang mga lakang sa pagseguro sa suplay sa tubig ug pag-atubang sa posibleng epekto sa El Niño.
