Gikumpirmar sa National Privacy Commission nga nakadawat kini og mga pahibalo mahitungod sa personal data breach gikan sa napulo ka ahensya sa gobyerno.
Lakip sa mga ahensya nga nakasinati og data breach mao ang Department of Information and Communications Technology (DICT), ang Department of Labor and Employment (DOLE)—partikular na pinaagi sa Bureau of Local Employment niini—ang Bureau of Internal Revenue (BIR), ug ang Philippine Amusement and Gaming Corporation (PAGCOR).
Nahitabo usab ang mga data breach sa Department of Justice (DOJ)—pinaagi sa Office for Alternative Dispute Resolution niini—ang Securities and Exchange Commission (SEC), ang Department of Trade and Industry (DTI), ang Department of Science and Technology–Philippine Institute of Volcanology and Seismology (DOST-PHIVOLCS), ang Presidential Commission on Good Government (PCGG), ug ang Philippine Coast Guard (PCG).
Matod sa NPC, nagsugod na sila og imbestigasyon bahin sa insidente gikan sa mga ahensyang nalambigit.
“Each notification received by the NPC is reviewed and assessed by our Compliance and Monitoring Division, which examines the nature and circumstances of the reported incident, its potential impact on affected individuals, and the measures undertaken by the agency concerned,” matud ni NPC Deputy Privacy Commissioner at Spokesperson Atty. Jose S. Belarmino II.
Dugang pa ni Belarmino nga bisan pa man og kabahin sa mandato sa Komisyon ang pagpanguna sa pagpanalipod sa sensitibong datos, responsibilidad gihapon sa mga ahensya sa gobyerno ang pagsiguro sa seguridad sa datos nga anaa kanila. Kini aron magarantiya ang kaluwasan ug mapugngan ang bisan unsang matang sa pagpahimulos batok sa mga apektadong indibidwal. Gipasiugda usab sa NPC nga ang mga ahensya, isip mga personal information controllers, adunay tulubagon sa seguridad sa personal nga datos nga anaa ubos sa ilang pagdumala—bisan pa kung ang maong datos gi-outsource o gi-subcontract ngadto sa mga third-party service provider.
Dugang pa, obligado sila nga magpatuman sa angay nga mga lakang sa seguridad—organisasyonal, pisikal, ug teknikal—aron mapanalipdan ang personal nga datos.
Samtang, nagpahinumdom ang Komisyon sa publiko nga magpabiling mabinantayon batok sa mga phishing attempt, scam, identity theft, ug uban pang matang sa social engineering nga mahimong mosangpot sa pagpahimulos, nunot sa mga gitaho nga data breach. Giawhag usab ang publiko nga mag-amping sa pagtubag sa mga kadudahan nga mensahe, pag-klik sa mga link sa website nga dili pamilyar, pag-download sa mga gilakip nga file (attachments), o pagpaambit sa personal ug sensitibo nga impormasyon.
Ang NPC mipasalig nga magpadayon sa pag-monitor sa mga taho bahin sa mga paglapas sa datos (data breaches) ug tumanon ang ilang mandato subay sa Republic Act No. 10173, o ang Data Privacy Act of 2012.
