Gipadayag ni Angel Redoble, ang Chairman ug Founding President sa Philippine Institute of Cybersecurity Professionals, nga nagpabilin nga “poorly secured” o huyang ang cybersecurity proteksyon sa digital environment sa gobyerno.
Atol sa pakighinabi sa Bombo Newsteam kang Redoble, gipaambit niini nga nagpakita og dakong kahuyang ang gobyerno sa tulo ka nag-unang pundasyon o pillars sa cybersecurity.
Nag-una niini ang kakulang sa igong skills ug kaalam sa mga personahe nga maoy nagbantay ug nagpadagan sa digital system sa gobyerno, ikaduha ang walay maayo ug natukod nga mga proseso o pamalakad nga gipatuman alang sa pagpanalipod sa mga datos.
Ingon man nga bisan pa man kon nipalit ang nagkalain-laing ahensya og mga mamahalong countermeasures o kabtangan, ang teknolohiya lamang dili gihapon igo kon walay sakto nga suporta sa mga tawo ug proseso.//
Busa, gihimug-atan niini nga kinahanglang balansehon ug palig-onon ang tanang bahin aron masiguro nga luwas ang mga sistema ug impormasyon gikan sa mga cyber threats.
Nipahimangno usab si Redoble, nga tanang ahensya sa gobyerno kay importanteng target sa mga cyberattack karong panahona.
Sumala ni Redoble, walay gipili o walay “discrimination” ang mga aggressor sa online threat, basta ang usa ka ahensya naghawid og sensitibo o batakang impormasyon:
Tungod niini, gipasiugda ni Redoble nga ang matag ahensya kinahanglang mangandam ug magpalig-on sa ilang seguridad tungod kay sa digital nga panahon karon, target na ang tanan.
