Magpadala og upat ka pilgrim images ang Basilica Minore del Santo Niño alang sa pre-fiesta activities karong Enero, dungan sa hugot nga pahinumdom sa pagpatuman sa saktong dress code sulod sa simbahan, sumala ni Fr. Jules Van Almerez, OSA, Media Liaison sa Basilica.
Gipasabot ni Fr. Almerez nga imbes sugdan sa Disyembre human sa Pasko ang pagbisita sa mga lagyong parokya, gihiusa na lang nila ang tanang pre-fiesta visitation gikan Enero 3 hangtod Enero 6. Kini human nila nakita nga kasagaran sa mga residente sa maong mga dapit ang sayong mobakasyon panahon sa Disyembre.
Aron maato ang tanang mga barangay, tambalanan, ug mga prisohan sulod lamang sa upat ka adlaw nga walay institusyon nga masakripisyo o malaktawan, nakahukom ang mga kaparian sa Basilica nga mopakatap og upat ka pilgrim images, imbes nga duha lang kabuok.
Samtang nagpadayon ang ilang orihinal nga plano sa mga kalihokan, gibutyag usab ni Fr. Almerez nga andam silang mopatuman og kausaban sa eskedyul sa Enero kon ugaling adunay hangyo gikan sa mga disaster risk reduction management offices sa probinsya ug siyudad, o kon dili na gayud maagwanta ang grabeng kainit sa panahon aron malikayan ang pagkakuyap sa mga deboto.
Sa katapusan, pormal nga nanawagan ang opisyal sa tanang mga peregrino ug deboto nga mobisita sa Basilica karong Enero sa pagsul-ob og saktong dress code. Matod niya, wala silay pilion ug walay exceptions sa maong lagda aron magsilbing maayong ehemplo sa tanan bisan unsa pa ang kahimtang sa kinabuhi. via Bombo Rocky Lavarez
