Gipasalig sa National Food Authority (NFA) nga aduna silay igo ug sobra pa nga buffer stock sa bugas aron matubag ang panginahanglan sa nasod, ilabi na kon adunay mga local government units (LGUs) nga mopailawom sa state of calamity tungod sa epekto sa El Niño.
Sa usa ka pahayag, gipasabot sa opisyal sa NFA nga ang kasamtangang pundo sa bugas sa ilang mga bodega makahimo sa pagpakaon sa tibuok Pilipinas sulod sa walo ka adlaw. Dugang pa, nagpadayon gihapon ang ilang pagpamalit og humay gikan sa mga mag-uuma hinungdan nga wala silay nakitang problema sa ilang imbentaryo.
Gikumpara usab sa opisyal ang sitwasyon karon sa panahon sa pandemya, diin bisan sa grabeng panginahanglan kaniadto, wala mahutdi og pundo ang ahensya sulod sa pipila ka bulan.
Giklaro sa NFA nga andam kaayo ang ilang ahensya sa bisan unsang emerhensya dala sa El Niño, ug nagpadayon usab nga walay hunong ang ilang milling operations aron masiguro ang padayon nga suplay sa bugas.
