Dili una makadula sulod sa labing menos duha ka semana ang star player sa Golden State Warriors nga si Stephen Curry human makasinati og injury sa iyang oblique abdominal muscle o kaunoran sa tiyan.
Sumala sa pahibalo sa Warriors, nakumpirma pinaagi sa MRI examination nga adunay gisi ang kaunoran sa tiyan ni Curry ug susihon pag-usab ang iyang kahimtang human sa duha ka semana.
Nahitabo ang injury atol sa ilang duwa kontra Houston Rockets niadtong Miyerkules, diin mipahawa si Curry sa court sa unang quarter human makasinati og kasakit sa tuo nga bahin sa iyang tiyan.
Napildi ang Warriors sa maong duwa, 115-108.
Tungod niini, gilauman nga dili makaduwa si Curry sa sunod nga mga duwa sa Warriors, lakip na ang ilang mga panag-atubang sa San Antonio Spurs, New Orleans Pelicans, Dallas Mavericks, Memphis Grizzlies, Boston Celtics ug Sacramento Kings.
Dakong hagit kini alang sa Warriors samtang magpadayon ang ilang kampanya nga wala ang ilang star player.
