-- ADVERTISEMENT --

Nakuha na sa lokal nga panggamhanan sa Loay, Bohol, ang patayng lawas ni Barangay Yanangan Kagawad Andres Patayon human kini makit-an sa katubigan sa Larena, Siquijor, kapin usa ka semana human siya gikataho nga nawala sa kadagatan.

Personal nga miadto sa Siquijor niadtong Miyerkules sa buntag, Nobyembre 18, si Loay Mayor Hilario Ayuban kauban ang ubang mga representante sa lokal nga panggamhanan aron kuhaon ang patayng lawas sa kagawad ug iuli sa ilang lungsod.

Nawala si Patayon niadtong Martes, Nobyembre 10, human kini mahulog gikan sa iyang de-motor nga bangka samtang nangisda pasado alas 9:00 sa buntag sa kadagatan sa Loay.

Base sa unang impormasyon, nahitabo ang insidente mga 1.11 kilometros gikan sa parola daplin sa Loay Boulevard.

Human sa pagkawala ni Patayon matag-adlaw nga nagpahigayon og operasyon ang kagamhanan sa lungsod sa Loay, Bohol pinaagi sa koordinasyon sa Coast Guard, PCG Sub-Station Loay ug sa lokal nga Disaster Risk Reduction and Management Office alang sa mga empleyado sa MENRO Panglao ug mga boluntaryong mananagat nga mitabang sa pagpangita.

-- ADVERTISEMENT --

Human sa kapin usa ka semana nga pagpangita, nakit-an ang patayng lawas ni Patayon sa katubigan sa Larena, Siquijor.

Gidala na ang patayng lawas pabalik sa Loay, diin ipahimutang kini alang sa hustong paghatod sa iyang kataposang pahulayan.