Gipasiugda ni US President Donald Trump, ang mga armas nga nagkantidad og kapin sa lima ka bilyon ka dolyar, nga giaprobahan sa iyang administrasyon alang sa Pilipinas, samtang gipalig-on sa duha ka nasod ang ilang relasyon sa depensa.
Atol sa usa ka bilateral nga miting uban ni Presidente Ferdinand Marcos Jr. sa Malacañang niadtong Miyerkules, gipadayag ni Trump nga gipataas usab sa Washington ang pondo nga gigahin alang sa pinansyal nga suporta sa militar sa Pilipinas. Hinuon, wala niya gitino kung unsa nga mga armas ang apil niini nga kantidad, ug wala usab niya gibutyag kung pila na ang nadala o na-deliver na sa nasod.
Gipasalig usab ni Trump nga gipalapad sa Estados Unidos ang kapasidad sa defense industry niini pinaagi sa pagtukod og 21 ka mga pasilidad, tumong niini nga mapadali ang produksyon ug maminusan ang panahon sa paghulat sa mga kaalyadong nasod nga nagpaabot sa ilang gi-order nga mga kagamitang militar.
Padayon nga gipalig-on sa Pilipinas ang kapasidad sa depensa niini taliwala sa mga tensyon sa West Philippine Sea. Ang Manila ug Washington gigapos sa 1951 Mutual Defense Treaty, nga naglatid sa kooperasyon tali sa duha ka nasod kung adunay mahitabong armadong pag-atake sulod sa sakop sa maong kasabotan.
Sa iyang bahin, gipasiugda ni Marcos nga ang Estados Unidos nagpabilin nga bugtong kaalyado sa Pilipinas nga adunay pormal nga kasabotan, samtang gisaulog sa duha ka nasod karong tuiga ang ika-75 nga anibersaryo sa ilang kasabotan sa depensa.






