-- ADVERTISEMENT --

Nagpahigayon na og case build-up ang National Bureau of Investigation–National Capital Region o NBI-NCR alang sa posibleng kasong economic sabotage batok sa mga opisyal sa usa ka cold storage facility sa Valenzuela City, diin nadiskobrehan ang mga bombay nga nagkantidad og P524 million nga gituohang smuggled.

Matod ni NBI-NCR Director Emeterio Dongallo Jr., nagpagawas na sila og subpoena ngadto sa mga direktor ug manager sa pasilidad aron motubag sa ilang imbestigasyon.

Gipasabot sa mga opisyal sa cold storage nga gipanag-iya sa ilang mga tenant ug lokal nga mag-uuma ang mga produkto, apan photocopy lamang sa mga kasabotan sa pag-abang ang ilang napakita. Matod ni Dongallo, wala pa silay lig-on nga ebidensiya nga nagsumpay sa mga bombay ngadto sa mga lokal nga mag-uuma.

Gikuwestiyon usab niya ang gidaghanon sa mga bombay nga giingong gikan sa lokal nga produksyon, ug posibleng may kalabotan kini sa pagpundo og daghang suplay aron makontrol ang presyo sa merkado.

Nagsugod ang operasyon niadtong Septiyembre 29 human makadawat og impormasyon ang NBI bahin sa daghang agricultural products nga gituohang gisulod sa nasud nga walay hustong permit ug dugay nang gitipigan sa maong pasilidad.

-- ADVERTISEMENT --