Usa ka 13-anyos nga batang lalaki ang namatay human nalumos dihang nahulog siya sa usa ka sapa sa Barangay Kabalaasnan, Dumanjug, Cebu, niadtong Sabado, Nobyembre 21, pasado alas 11:40 sa buntag.
Ang biktima usa ka estudyante sa Grade 8 ug residente sa Barangay Masa sa maong lungsod.
Sumala sa Dumanjug Municipal Police Station, base sa asoy sa magulang nga babaye sa biktima, nag-uban sila sa dihang namatikdan niya nga nawala ang iyang manghod, kinsa gikatahong nahulog sa sapa.
Sa dihang nadungog niya ang pagsinggit sa bata alang sa pagpakitabang, daling midagan ang iyang igsoon padulong sa maong dapit aron unta luwason siya.
Apan, taliwala sa iyang mga paningkamot, wala niya kini makuha gikan sa tubig.
Dali nga nagpakitabang ang igsoun niini gikan sa mga tawo sa palibot, samtang ang mga personahe sa Bureau of Fire Protection (BFP) miresponde usab aron motabang sa pagkuha sa biktima.
Human nakuha gikan sa sapa, ang bata gidali pagdala ngadto sa Barili District Hospital aron hatagan og medikal nga atensyon.
Apan, gideklarar kini nga patay na pag-abot sa ospital.





