Plano nga itukod sa usa ka kompanya sa China ang mga wind turbine sa Dagat Pilipinas nga makasugakod sa kusog nga mga bagyo aron masiguro ang mas lig-on nga suplay sa kuryente.
Gihisgutan ni Presidente Ferdinand Marcos Jr. ang proyekto uban sa mga opisyal sa Ming Yang Smart Energy Group sa Shenzhen, China niadtong Biyernes atol sa sidelines sa APEC Summit.
Sumala sa kompanya, ang mga wind turbine niini adunay teknolohiya nga makasugakod sa kusog sa mga super typhoon nga molapas sa Category 17.
Diin ang duha ka habig mipirma usab og kasabutan aron magtinabangay sa pagpalambo sa mga proyekto sa offshore wind energy sa nasud.
Ang plano sa kompanya naglakip sa pagtukod og usa ka sentro alang sa pagmentinar ug pag-ayo sa mga windmill sa Pilipinas aron mapadali ang serbisyo ug mapadayon ang hapsay nga operasyon sa mga pasilidad.
Ang proyekto gilauman nga makatabang sa pagpalapad sa limpyo nga enerhiya ug adunay mas kasaligan nga suplay sa kuryente sa nasud, labi na sa panahon sa kusog nga mga bagyo.









