-- ADVERTISEMENT --

Miapil sa 7 marathon ang usa ka 38-anyos nga babaye sa Estados Unidos bisan pa sa iyang pagmapdos, lakip na ang New York City Marathon nga iyang giapilan sa ikawalong bulan sa iyang pagpamapdos.

Giila kini nga si Deirdre Keane, usa ka nurse practitioner ug management consultant nga dugay nang misalmot sa marathon ug nakahuman sa kapin 60 ka lumba sa wala pa siya mabuntis. Tumong ni Keane alang sa 2026 nga makompleto sulod sa usa ka tuig ang pito ka World Marathon Majors, nga naglangkob sa Tokyo, Boston, London, Sydney, Berlin, Chicago ug New York.

Nagsugod siya sa Tokyo Marathon niadtong Marso. Apan atol sa Boston ug London Marathons niadtong Abril, namatikdan niyang mas hinay na ang iyang dagan ug lahi ang iyang gibati, hangtod nga iyang nahibaw-an pinaagi sa pregnancy test nga siya buntis diay.

Imbes nga undangon ang iyang tumong, nakigsabot si Keane sa iyang bana ug doktor bahin sa pagpadayon sa marathon.

Gitugotan siya sa iyang doktor nga modagan tungod kay usa na siya sa pinakataas nga endurance athlete sa wala pa mabuntis, apan gipahimangnoan nga bantayan ang iyang pagkaon ug pag-inom og tubig, ug mohunong dayon kung makasinati og sakit sa kaunoran o uban pang problema.

-- ADVERTISEMENT --

Niadtong Agosto, nahuman niya ang Sydney Marathon sa ikalimang bulan sa iyang pagmabdos, gisundan sa Berlin Marathon sa ikaunom nga bulan ug Chicago Marathon sa ikapitong bulan.

Ang pinakalisod niyang hagit mao ang New York City Marathon nga iyang gidagan sa ikawalong bulan sa iyang pagmabdos. Nahuman niya ang lumba sulod sa 4 ka oras, 6 ka minuto ug 55 segundos, nga adunay average nga dagan nga 9 ka minuto ug 26 segundos matag milya.

Miangkon si Keane nga talagsaon ang pagdagan og marathon sa ikatulong trimester sa pagmabdos, apan misalig siya sa iyang kahibalo sa kaugalingong lawas ug sa pagtugot sa iyang doktor.

Human makompleto ang pito ka World Marathon Majors, gusto ni Keane nga mapasa sa iyang umaabot nga anak ang usa sa labing importante niyang nakat-onan sa pagdagan ang pagkamalahutayon ug pagtuo nga kaya niyang atubangon bisan ang pinakalisod nga mga hagit.